أجري ورا حلمك

كل مره ينزل event لcairo runners أقول عايزه أروح .. بس دايما كان في سبب أني ماروحش ولا مره .. بصراحه أسبابو أعذار هبله جدا زي: ايه اللي هيصحيني بدري يوم الأجازه؟ أو مش هعرف أذاكر؟ أو ماليش في الرياضه؟ أو مش بعرف أجري؟ أو هضحك الناس عليا ليه؟ أو هتعب نفسي و رجلي هتوجعني؟ أو مفيش حد يشجعني؟ 

كل الأسباب اللي فوق دي كانت في دماغي طول الفتره اللي فاتت !! و سببها الوحيد كان الcomfort zone "أنا قعده كويسه ليه أجيب التعب لنفسي؟" 

مبدأياً cairo runners دول مجموعه من الشباب قرروا أنهم ينزلوا يجروا في شوارع القاهره .. و عملوا أول مجموعه بتجري سوا في مصر .. كل يوم جمعه من الساعه 7 الصبح ل10 الصبح بينزلوا يجروا في مكان مختلف عن اللي قبله في مصر الجديده و المعادي و الزمالك و مدينه نصر و الدقي و الجيزه .. و أول مره يجروا جالهم 70 واحد و كانوا مبسوطين بس في مره فاجأه جالهم 1000 و دي كانت سعاده تانيه خالص ...

أنا شوفت بعيني محدش قالي .. كل الأعمار و بنات و ولاد و مافيش حد ضايق حد و كل الناس كان هدفها تتبسط و تجري و تتنشط و تنضف المكان بعدها ...

عرفت أن cairo runners مع الUNICEF بيحتفلوا يوم الجمعه مع مبادرات "صفحه في الشارع" باليوم العالمي للشباب (هنا المحروسه-أنا حامل-شفت تحرش-ريسيكلوبيديا-خريطه تحرش-10جنيه في الخير-لوعندك دم-مشروع خير-و غيرهم) .. و قررت أروح ...

صحيت الساعه 6 و جهزت أنا و بابا و نزلنا 6:30 و وصلنا 7:00 لبوابه المعادي2 عند بنزينه Total و عرفنا أننا وصلنا لما لقينا زحمه كتير و كل الناس بلبس رياضي .. نزلت و وقفت معاهم و بابا قرر يقعد في مكان قريب مننا .. شويه و بدأنا نجري !! أنا عمري ما جريت قبل كدا ف شيرين و بشوي-بنت و ولد أتعرفت عليهم هناك- قالولي tips عشان ماتعبش لما أجري و جريوا جنبي لحد ما أطمنوا عليا ^_^

و لأول مره بالنسبه ليا شويه أجري و شويه أمشي لحد ما خلصت ال5 كيلومتر بشوارعهم و كباريهم و نيلهم ...

و لما خلصت بكلم بابا لقيتوا بيمشي معانا من الأول ال5 كيلو كلهم .. و الشباب شجعوا بابا و قالوا له "عاش عمو" !!

في خلال اليوم كله في ushers لابسين t-shirts cairo runners و ماسكين أكياس سودا كبيره عشان القمامه ماتترميش في الشارع .. و بعد ما اليوم خلص لموا القمامه اللي باقيه في الجنينه و النافوره ^_^

أنا بعتبر أنهرده يوم طلعت فيه من الcomfort zone و عملت حاجه كنت شايفها مستحيله .. أنا كملت ال5 كيلومتر (مابين جري و مشي) والله مش مصدقه نفسي .. و كذا مره أتعب و أقول هكلم بابا و أرجع أقول دي مغامره و هعملها للأخر و أكمل ...

أي حاجه مش عاده بالنسبه لينا بنفتكرها وحش كاسر و صعب نواجهه و كأنه أسد أسود و مخيف و عملاق وهيأكلنا بس لو واجهت الوحش دا و وقفت قدامه هتكتشف أنه مش أكتر من الكلاب اللي في العربيه بيهزوا في رأسهم و لا بيهشوا ولا بينشوا .. أهم حاجه تتحدى نفسك و تتحدى قدراتك عشان تجيب أخرها و تجري ورا حلمك و توصله و تحققه ^_^

مش هموت ناقص حلم !!!