سنه أولي

أنهرده يوم مميز جداً لأن دا أول عيد ميلاد للمدونه دي .. زي أنهرده قررت أدخل عالم التدوين .. أنا فرحانه جدا بكل حاجه عملتها في السنه دي من كتابه في المدونه و في روزاليوسف و في Pens and Books و فرحانه جدا من مشروع الحسن و فرحانه جدا بكل شخص اتكلمت معاه و اتعلمت منه ...

و أنا ببدأ المدونه دي ماكونتش عارفه اتخيل حاجه معينه بس قولت اجري علي الله .. بدأت و بعدها كان أقصى أحلامي أني أوصل ل10,000 مره الناس تدخول علي المدونه -كنت عارفه انها صعب جدا تتحقق و كان السبب القوي جدا لأن حلمي مش ممكن اني عملت اكتر من مدونه و فشلوا جدا لأن محدش يعرفهم غيري اصلا- .. أحب أقول أن المدونه وصلت لأكتر من 19,000 مره الناس تشوفها في سنه بدل ال10,000 اللي كان نفسي فيهم .. مش بس كدا أنا اتعلمت كتير أوي ...

ف بما أني نجحت تقريبا بأكتر من أحلامي مضروبه في اتنين ^_^ ف شكراً لكل واحد من اللي قرأوا المدونه مره أو كل مره .. ربنا يخاليكوا ليا لأن أنا من غيركم مكونتش هعرف اصلا اني بعرف أكتب و بعرف أوصل كلامي بطريقه حلوه و سهله ... 

شكراً تاني لكل أنسان قرأ لي مره او أكتر و ربنا يكرمكم و يسعد قلوبكم زي ما أسعدتوني ...

على فكره: أنا عمري ما كتبت غير موضوع التعبير و الcomprehension او الessay فالمدرسه و كان عندي كام محاوله فاشله في التدوين راحوا لحال سبيلهم .. و لما قرأت كتير عن التدوين أتعلمت كتير و عرفت غلطاتي ف قدر الله مع شويه مجهود مني أني أنجح و كدا .. و بعد شويه علي المدونه اتعرفت علي pens and books و بعدها روزاليوسف و ربنا يسهل في المستقبل القريب و البعيد كمان :) نتعلم من كدا أن الكتابه هوايه ممكن ننميها و نتعلمها مش ملكه يا أما عندك يا أما لاء زي ما الناس فاكره .. و بعدين كل الناس بتقع في الأول بس لازم نتعلم من الوقوع و نقف و نكمل مشي زي الطفل لما يبدأ يتعلم المشي بيقع و بعدين يقف و يكمل مشي عادي جدا بس المهم يتعلم ...

معاد أشكر فيه كل بني أدم أعرفوا و شجعني ...

شكر خاص لكل عائلتي الصغير (أمي داليا حتاته و أبويا حسام راشد و أختي فرح راشد) علي أنهم شجعوني و صلحوا لي كتير في العربي اللي بكتبوه :*
شكر كمان لعائلتي الكبيره :*

شكر لكل أصحابي-القريبين و النص نص و اللي أخر معرفتي بيهم الsocial media اللي كلامهم مصدر سعاده و فخر ليا (لبني المصري و نوران سامي و نور خالد و شيماء محمود وعمرو دياب و محمد منير و عاصم أشرف و جاسر عقيله و علياء الشيناوي و ساره عبد الكريم و شاهيناز فتحي و مي طاووس و بسمه السباعي و جمال عبد الشافي و د/ رغده الأبراشي و ديانا الحريري و نوران عظيم و جاسر درويش و سحر فؤاد و خديجه رحاب و حجاجوفيتش و حبيبه خطاب) و كل اللي نسيت أقول أساميهم او معرفهومش ^_^

شكر خاص جدا جدا للي بعد ربنا خالهم سبب رئيسي أني أكمل السنه و سنين تانيه جايا كتير أنشاءالله: أحمد حجاج او حجاجوفيتش-أبن فطوطه بتاع العصر الحالي-لأنه أول حد شجعني .. بسمه السباعي-كاتبه في روزاليوسف-لأنها عرفتني علي بوابه روزاليوسف .. سحر فؤاد-مدونه-و جاسر درويش-صاحب فكه-و حبيبه خطاب-بتشتغل في الأمم المتحده-و سلمى متولي-مصممه مكياج-عشان سابوني اكتب عنهم .. مي زين الدين و كل أعضاء مؤسسه الحسن من مستخدمي الكراسي المتحركه لأنهم بردو دردشوا معايا في قصص حياتهم و سابوني أكتب عنهم .. مصطفى النجار عشان شجعني و قالي طرق عشان تطوير طريقه الكتابه بتعتي :)

معلش قولت شكرا كتير بس دي أقل حاجه أعملها في يوم عيد ميلاد المدونه الأول و مش الأخير أنشاءالله ^_^

كل سنه و أنتم بخير و دايما معايا و مشجعني كدا .. سلام ^_^