قصتي
"في يوم من الأيام قررت التوقف عن قراءه قصص الناجحين و تمني أن أصبح مثلهم .. قررت بأن تكون لي قصتي الخاصه"-دكتوره ناديه العوضي رئيسه اتحاد الصحفيين العلميين و تسلقت قمه كلمينجارو في عمر ال40 مع أنها ام لأربعه أطفال و لابسه حجاب و مش رياضيه-من كتاب "ة" لشيماء الجمال.
يمكن من يوم ما اشتريت الكتاب دا و قريته و الجمله دي مأثره فيا اوي .. و أثرها اتحفر جوايا حتى لما تخيلت أني نسيتها و أول ما قرأتها تاني رجعت افتكرت ...
أنا عايزه قصتي .. كفايا قرايا عن حجاجوفيتش و عن عمر السمره و عن اوبرا وينفري و كل الناجحين اللي ليهم قصه بتعتهم .. كفايا عشان انا لازم اكون زيهم و يكون لي قصتي اللي مش شبه اي قصه بس شبه كل القصص ...
اصل كلنا شبه بعض لاننا انسان و عايزين ننجح و لينا قصه .. بس تفاصيل كل قصه مختلفه عن غيرها كتير اوي .. اه كلنا عايزين النجاح ف قصصنا شبه بعض و لكن تعريف نجاحنا و قصتنا هو المختلف ...
يلا أحنا قرينا قصص كتي لناس نجحت و قصصهم كبيره او قصصهم صغيره .. عرفنا احمد حجاجوفيتش اللي لف العالم و اتعرف بأنه ابن بطوطه الجديد و قرينا عن اوبرا وينفري اللي كانت اول مذيعه سودا بعد ما قالوا انها مش واجها و انجيلينا جولي اللي مش بس ممثله دي كمان متطوعه في أعمال خيريه و سوريا و ساعدت ناس كتير اوي و كمان كانت مثال للانسان و ديزني اللي عمل احسن افلام كارتون بعد ما اتقال عنه فاشل في التخيل و توماس اديسون اللي اتقال عليه متأخر عقليا و بعد 99 محاوله نجح في اختراع اللمبه .. مغيرتوش كدا و عايزين تكونوا مشهورين زيهم و يكون لكم قصتكم اللي مليانه نجاح و سعاده و فرحه ...
لو قررت انك عايز تكون ليك قصتك و بعد شويه سنين و شويه مجهود الناس تقرأ قصتك و تتعلم من نجاحك و الناس كمان تقرر بسبب قصتك يكون لهم قصتهم .. كمل قراءه ...
اول حاجه لازم نكتب حاجه أسمها الmission statement و دي جمله انت بتقول فيها انت ليه موجود و ايه اللي عايز تحققه .. ممكن تخلي الجمله دي في 6 كلمات بس عشان يكون سهل تحفظها و تحققها و دي اتعلمتها من دكتور فيل جونسون ...
بعد ما تكتب الmission statement حطها قدامك دايما .. علق واحده على مرايه الحمام و واحده قدام المكتب و واحده في المحفظه و لازم مع كل دا تكون حافظها في عقلك و قلبك كمان ...
بعدين قسم الmission statement دي لاهداف صغيره عشان تعرف تحققها و بالتالي تكون حققت الmission statement ...
يلا أنا خلصت كلامي .. قوموا فكروا و اكتبوا الmission statement بتاعتكم و بعدها قسموا اهداف و ابدأوا حققوا الأهداف و عيشوا حياتكم و أكتبوا قصتكم و افرحوا بيها مهما كانت كبيره او صغيره ^_^
Comments
Post a Comment