حدوته قبل النوم
حدوته قبل النوم .. و انا صغيره كان دايما بابا بيحكيلي حدوته عقله الاصبع او سيندريلا او علي بابا و الأربعين حرامي .. و لما كبرت حدوته قبل النوم محدش بيحكيهالي .. بس ابتدا يكون عندي حدوتي قبل النوم ...
قبل النوم دا عالم لوحده .. مليان دعاء كتير بيبدأ ب"يا رب" و بعدها انجح او اوصل للي انا عايزه او بابا و ماما يوافقوا علي حاجه معينه او ان ربنا يرحم تيتا و جدو او ان ربنا يشفي مريض عزيز عليا او ان ربنا يرزقني بأبن الحلال او ان ربنا يفرحني و يفرح قلبي او اني اسافر العالم او او او ...
قبل النوم بردو مليان خيالات و بنتمني تتحقق ..نفسي يكون عندي مدونه او عندي كتب منشوره او اكون مذيعه في التليفزيون او اكون public speaker او يكون عندي المؤسسه غير هادفه للربح اللي بحلم بيها او اني اكون مشهوره و الناس بتيجي تسلم عليا و تتصور معايا او اني اسافر العالم كله او او او ...
قبل النوم ممكن يكون مليان ذكريات و في منها السعيد و ننام و في ابتسامه على وشنا و نصحي علي نفس الابتسامه و الmood دا و نفضل مبسوطين او ذكريات حزينه و ننام بدموع في عيونا و نصحى بنفس الدموع و نفضل في دوامه الmood الحزين .. و علي فكره السعاده بتفضل بس الحزن بيغلب لو موجود و بيعكنن الايام كلها لحد ما نقرر نضحك و نبتسم تاني ...
قبل النوم دا عالم مليان كلام و فضفضه بينك و بين ربنا و بس و مليان خيالات لنفسك تعمل ايه في حياتك و مليان ذكريات منها الحلو و منها الوحش .. اهم حاجه تحاول عالم قبل النوم بتاعك يكون مليان سعاده و فرحه عشان تنام علي ابتسامه و تصحى علي ابتسامه :) و لو عندك مشكله دي مش اخر الدنيا .. و الله مش اخر الدنيا .. لأن اي مشكله لها حل و ربنا كبير و خالقنا عشان نكون مبسوطين مش متعكننين ف أكيد ربنا كاتبلنا حاجات حلوه كتير حلوه بس لازم نصبر و ندعي رينا كتير عشان الدعاء و الكلام مع ربنا دا حاجه حلوه اوي و ربنا بيحبها جدا و كمان دي للطريقه الوحيده اللي ممكن يتغير بيها القدر ...
دعاء بظهر الغيب و لي بالمثل: يا رب يسعد قلوبكم و تكونوا دايما مبسوطين و محققين كل امانيكم :)
يلا قولوا امين!!
Comments
Post a Comment