ألعب و أفرح
مش مهم ابدا سنك من رقم واحد ولا وقمين ولا انشالله يكون ثلاث ارقام .. الرقم مش مهم ابدا ابدا .. المهم بجد سن روحك كام .. يعني ممكن سنك يكون 20 بس روحك 80 و ممكن سنه 80 بس روحك 20 ...
أنا عندي 20 و نظرا لأني قصيره ف محدش مقتنع بسني اصلا و فكرني لسا في المدرسه مش في الجامعه .. و ناس كتير بتفتكر أختي الصغيره اكبر مني لأنها الطويله .. كل دا بيأكد علي فكره اني صغيره ^_^
ليه بنكلم في الكلام دا .. عشان عادي تلاقيني طالبه جامعيه و داخله سنه ثالثه كمان و شاطره في دراستي و نازله تدريب شغل و عندي مدونه كمان و بحب أحضر مناقشات عن علم النفس و التنميه البشريه كمان .. و عادي بردو يلاقيني طفله جدا لما أشوف بلالين و غزل بنات و لعب و مراجيح و أحب ألعب جدا جدا ...
أوعي تقول طفوله متأخره !! دا أنا عيشت طفوله ماليانه لعب و دلع .. بس دي عشان كل واحد فينا جوا منه طفل و أنا بحب العب مع الطفل اللي جوايا جدا ^_^
يعني أمتي أخر مره أشتريت لنفسك حاجه نفسك فيها و منغير سبب يعني مثلا اشتريت لنفسك فانوس طب لما شوفتي بلالين حلوه و عجبتك ليه مجبتيهمش .. ليه لما كان نفسك تروح Dream Park ولا Magic Galaxy قولت لاء انا كبرت علي كدا .. أمتي أخر مره اكلت مصاصه ولا بتقول أنا كبرت ...
طب علي فكره عمرك هيعدي و يخلص و انت مش عايش حياتك عشان مقتنع انك كبرت و عجزت مع انك والله حلو و صغير بروحك مش سنك و ممكن تلعب و تجري و تعمل كل حاجه روحك عايزاها ^_^
من الأخر رايح الطفل اللي جواك بعيد عن سنك كام و مكانك ايه و دارس ايه و بتشتغل فين و مدير مين ...
Comments
Post a Comment