رمضان بح
رمضان جيه و خلص .. رمضان بح خلاص .. و عايزه اتكلم معاكم عن اكتر 2 مسلسل انا شوفتهوم و مفوتش حلقه و عايزه اتكلم عن مسلسلات شوفتها شويه و عايزه اتكلم عن برامج عرفت فكرتها و عايزين نحكي علي الاعلانات .. يلا بينا ...
اول مسلسل انا شوفتوا و فرحت بيه اوي مع ان مفيهوش حاجه تفرح كان سجن نسا .. نيلي كريم ابهرتني في بنت اسمها ذات و ازاي شاكلها نافع ست مصريه كادحه كمان .. و في سجن النسا كانت فوق توقعتنا اصلا .. مش بس نيلي كريم كل اللي عملوا المسلسل الواقعي دا طلعوا بشكل جديد و اكتر من رائع لدرجه اني مافوتش ولا حلقه واحده اصلا .. غاليه (نيلي كريم) من سجانه لمسجونه في جريمه قتل هي بريئه منها و ابن بعد تعبها عليه و حبها فيه مات و ظلم ميستحملهوش انسان اصلا .. دلال (دره) مع ظلم و فقر و الزن علي الودان امر من السحر .. رضا (روبي) و عزه النفس و وجعها و معني العفو عند المقدره .. و أدوار كمان زي المسجونه في قتل جوزها دفاع عن بنتها و الغجر و ان حياتهم عكس حياتنا عندنا الراجل لازم يشتغل و عندهم الست لازم تشتغل و الراجل لايمكن يشتغل عشان ميقولوش علي الست مش مكافيه بيتها ...
مسلسل رائع و بيظهر سجن النسا بحياته الحلو و الوحش ...
تاني مسلسل هو الوصايا السبع .. و دا انا شايفه مش واقعي لان مافيش جثث بتختفي بس شايفه مختلف و معتمد علي الصوفيه في التتر و الموسيقى التصويرية و دي حاجه جديده علينا .. سر نجاح المسلسل في انه عارض حياه جديده و غريبه علينا كلها قتل و وصايا و ميت بيختفي ...
مسلسل رغم انه خيالي بس عجب ناس كتير و ناس كتي تبعته و فعلا اختلافه حلو ...
مسلسلات مش متبعاها اوي بس شوفت منها .. صاحب السعاده و بيتكلم عن اهم المعاني الاسره و السعاده .. دلع بنات حسيت ان مي عز الدين بتقلد عبله كامل شويه .. دكتور نسا و حسيت ان مصطفى شعبان بيقلد نفس الدور بس في اطار مختلف شويه من مصمم عبايات لدكتور .. بس كدا ...
نكلم عن البرامج اللس كلها مقالب .. زمان كان ابراهيم نصر دمه خفيف و بيضحك و بسيط .. بعدين حسين الامام و بدأ يخوف الناس بس بردو بطريقه لطيفه .. بدأ رامز في رعب و حاجه انا مش قبلها شخصيا و مش هيبطل غير لما حد يموت في التصوير بدا ب اسنسير و اسد و وصل لقروش في البحر و مركب بتغرق و كومبارس بتتاكل و بيطلع دمها و ايدها .. محمد فؤاد و لاول مره بيعمل برنامج مقالب له علاقه بأسرائيل و فاجأه تتخطف و يتحقق معاك و مش عارف ايه-احساس شخصي ان محمد فؤاد بيقلد رامز جلال ...
انا بحب البرامج دي من باب المتفرج اللي بيضحك بس لو انا الضيف مش عارفه هعمل ايه ولا ايه هيكون رد فعلي ...
برنامج ديني حلو جدا هو عيش اللحظه و معني كل لحظه بنعدي بيها من لحظه ظلم او الم او حزن او السعاده او اعجاب او حب او مرض و بيعلمنا ازاي نعيشها زي ما ربنا عايزنا نعيشها ...
الأعلانات .. اختلاف واضح من كمبوند الشقه بملاين لأتبرع و لو بجنيه .. عندي شويه ملاحظات كدا وي مسلسل الجوع ليه كدا؟ زي انا معنديش حلم؟ زي انا نفسي بابا يعيش؟ .. ليه بنهتم باننا نظهر عواطف و شحتفه بدل ما نعمل حاجه فعلا .. اتعلموا من 57357 عايزين فلوس بس عاملين اعلانين كلهم امل من اطفال المستشفي لكل المشاهدين سيبها علي الله و افرح و بلاش تشيل هم ...
انا مش منحازه ل57357 لسبب معين بس فعلا اعلانهم جديد و مميز و اغاني رائعه و عشان كدا فاكرينه و محبوب .. اعملوا مجهود و خالوني اشوف طرق كتير للمساعه مش بس فلوس و قولي فلوسي بتروح فين عشان مش مهم اتبرع علي قد ما هو مهم اني اعرف تبرعي عمل ايه ...
كفايه رغي و اتكلمنا عن حاجات رمضان يلا نستمتع بالعيد و الكحك و الغريبه و مسرحيات اول يوم العيد من العيال كبرت و المتزوجون و خروجات و لبس العيد و العيديه .. كل سنه و انتم طيبين و يا رب دايما مبسوطين :)
Comments
Post a Comment