حواديت ...

أنهرده أنا كنت في مكان حلو أوي بحضر ندوه حلوه أوي .. أنهرده أنا كنت في حواديت بحضر حدوته من حواديتهم و البطل كان عصام يوسف .. أنا و بابا و فرح أختي قررنا نروح بعد الفطار .. وصلنا بسهوله لشارع مصدق و سألنا علي مستشفي أحمد شفيق و لقينا حواديت علي طول .. طرقه و بعدها جنينه و قعده مريحه للأعصاب و جوا مكان صغير و عائلي جدا مليان كتب مختلفه و مشغلين محمد منير .. بعدين بدأت الحدوته ...

قبل ما احكي الحدوته هتكلم عن حواديت .. مركز ثقافي و فني بيعمل في مجال النشر و التوزيع و الندوات الثقافيه و الحفلات الفنيه المميزه و مهتم بأكتشاف المواهب الجديده و بينظم كورسات فنيه ...

دلوقتي نتكلم عن الحدوته .. عصام يوسف ابن عبد التواب يوسف و ماما لبني أشهر ناس بتكتب للأطفال .. بس أبنهم ماكنش بيكتب و كان أخره في الكتابه مواضيع التعبير في المدرسه و كان بيجيب فيهم دراجات عاليه و المدرس كان بينجحوا عشان التعبير .. و أتخرج من أداب أنجليزي و عشان بيحب البيع و الشراء أشتغل في العربيات .. و بعدين بدأت قصه "ربع جرام" و كان عايز يعملوا فيلم و عشان يتعمل فيلم لازم يتكتب و لما قالمابيعرفش يكتب قالوا لو جرب .. و لما قعد يجرب كتب 20 صفحه و عجب صحابه و كمل 1000 صفحه و بعدين شاف ان دا كتير و حاول يختصر لحد 600 صفحه و كل تفصيله في الكتاب ليها سبب و دلاله .. و بما أنه جديد في مجال الكتابه فطبع الكتاب بنفسه و صمم الغلاف بنفسه و بعدين وزعه علي المكتابات الجديده بنفسه في virgin و الديوان و كتب خان .. و الكتاب لحد دلوقتي أطبع منه 35 طبعه .. الكتاب من وجه نظر كل اللي قرأه أنه كتاب لازم يكون موجود في كل بيت مش بس عشان بيتكلم عن الادمان بس عشان ال12 خطوه دول مفيدين جدا في تخاطي التعلق بأي شئ و أدمان أي حاجه من أول الاكل و لحد المخدرات ...

بعدين بدأ يكتب 2 ظباط بس منجحش نفس النجاح .. و بيجهز لمسلسل في رمضان 2015 اسمه ذهاب و عوده و بطولته لأحمد السقا و شريف منير ...

عصام يوسف معترف ان الحظ كان صديقه الصدوق و السبب الرئيسي في انه يكتب و ينجح و يتجه للتلفيزيون و السينما انشاءالله ...

أنا أستمتعت بالمكان و منير و أتمني دايما يكون في أغاني لمنير و فيروز و دينا الوديدي و حمزه نمره و الناس العظيمه دي .. كمان أستمتعت بالزرع و الخضره و المكان كله تحفه و مريح للأعصاب و صغير و عائلي جدا .. و أنا متأكده ان دي أول حدوته أحضرها بس مش أخر حدوته أخترها ...