قادرون بأختلاف 16
الشخص الستاشر مش هنقول هو مين .. هو مش عايز يقول أسمه و بعدين الأسامي مش فارقه .. درس تجاره جامعه القاهره و عامل دبلومه في الجامعه الامريكيه و حضر للCPA و كمان وقت الدراسه كان بيشتغل team leader في مركز معلومات مصر في الcall center .. و بعد التخرج بيشتغل في موبينيل من 2006 و لحد دلوقتي ...
في 2007 عمل حادثه عربيه و هو في الطريق من أسكندريه (دخل في مقطوره) .. دخل مستشفي دار الفؤاد كان عنده كسر في العمود الفقري و كدمه في النخاع الشوكي و كسر في القفص الصدري ز نزيف في الرئه و كدمه في الجمجمه و في المستشفي أقنعوا اهله ان عنده جلطه في رجله و لازم يفضل في المستشفي عشان ماتتنقلش للقلب او للمخ .. لما حس أن في حاجه غلط و أنه مش بيخف راح مستشفي السلام الدولي و بعدين شهرين و نص أتعالج .. طلع من السلام الدولي و دخل مركز العلاج الطبيعي في العجوزه ...
وجوده في المركز ساعدوه يعرف أنه مش الوحيد ولا الأسوء و أن هو أحسن كتير من غيره .. و الحياه في المركز ساعدته أنه ياخود تفكير المصري لمستخدم الكرسي المتحرك كتحدي ...
هو شايف أن حياته اتغيرت لأنه أختياراته محدوده في الشغل و مع أصحابه و في الحياه عموما .. و شايف أكبر تحدي بيقابله هو انه يثبت للناس أنه قادر علي كل حاجه و بيكسب دايما في دا ...
السر اللي بيخلي اللي يتعامل معاه ما يفتكرش أنه من مستخدمي الكراسي المتحركه هو أنه مش حاسس أصلا أنه من مستخدمي الكراسي المتحركه :) ببساطه هو شايف نفسه زي أي انسان بيعرف يعمل حاجات و حاجات تانيه لاء و أختلافه في اللي بيعرف يعمله مش اللي مبيعرفش يعمله ...
رساله مني ليك: ربنا يخاليك دايما سبب في سعاده اللي حواليك و أمل ليهم .. و ربنا يخاليك دايما سبب في أنك تعلم غيرك الكتير :)
Facebook page: Alhassan Foundation for Spinal Cord Injury
Website: www.alhassan-foundation.org
رقم حساب مؤسسه الحسن: ٧٠٥٧٥٠ في البنك العربي الافريقي الدولي - فرع نادي الصيد
Comments
Post a Comment