رمضان جنه :)

رمضان .. شهر روحانيات و ترويح و افطار و سحور و ياميش و كركديه و قمر الدين و مسلسلات كمان و زينه في الشوارع .. شهر مزيج بين الروحانيات و الأكل و المسلسلات .. شهر بنشتاق له من السنه للسنه ...

الشهر دا له روح حلوه اوي .. الشهر دا ساعه الفطار تسمع تخبيط المعالق و الاطباق في مل المطابخ في نفس الوقت .. تلاقي الناس كلها تقوسها تقريبا واحده .. تلاقي كل بيت جواه كركديه و قمر الدين و عرق سوس و سوبيا و تمر هندي عشان بعد الفطار .. تلاقي القطايف و الكنافه و البسبوسه عشان ما بين الفطار و السحور .. تلاقي الفول و البيض و الجبنه و العيش عشان السحور ...
لو روحت اي بيت في رمضان هتلاقيه شبه بيتك اوي .. فيه من روحك كدا .. هتلاقي كل الناس شبه بعض فاجئه بس بطريقه حلوه ...
في رمضان هتلاقوا الناس كلها بتسمع اغاني دينيه لماهر زين مثلا و أدعيه و توشيح و أغاني ليها علاقه برمضان من زمان اوي ...
هتلاقوا البيوت كلها فيها فوانيس و قماش خياميه و مدفع رمضان ...

رمضان هديه ربنا بيهديها لينا كل سنه عشان نتوب عن اي ذنب و عشان نقرب لربنا اكتر و اكتر .. هديه عشان الناس تسأل علي بعض .. هديه عشان لم شمل العيله .  هديه عشان اللي بيدخن ممكم يبطل و التخين ممكن يخس .. شهر مليان خير و طيبه و مميزات كتير ...

تعالوا نخلي رمضان اكتر من شهر الصيام .. تعالوا منفوتش فرض .. تعالوا نصوم صح و يكون الصيام مش اكل و شرب بس الصيان يكون عن كل حاجه غلط ممكن نكون بنعملها ...
تعالوا نتفرج علي مسلسلات و برامج رمضان بس منغير ما تلهينا عن فروضنا و أولويتنا في رمضان ...
تعالوا نزود في خطتنا بتاعت المسلسلات برامج لمعز مسعود و مصطفي حسني .. صدقوني بيزودوا روحانية رمضان و معلوماتنا عن ديننا ...

دا رمضان بالنسبه لي .. احكولي عن رمضان بالنسبه ليكم عامل ازاي؟ ايه اهم حاجه بتفرق رمضان عن باقي السنه!!