الخير فينا !!
أنا شهد من جامعيه بدايه في الجامعه الالمانيه و هكلمكم انهرده عن project جديد انهرده بتاع بدايه .. كل سنه بنعمل "كلنا مسحراتي" عشان شنط رمضان بس السنه دي الموضوع مختلف كتير .. السنه دي 75% رايحين لشنط رمضان اللي هتتوزع في اماكن كتير جدا زي بطن البقر و البراجيل و ترب اليهود و غيره جوا و برا القاهره كمان & 25% رايحين لمشروع تنميه مستدامه في بطن البقر للتعليم و محو الاميه بنظام الميتسوري الياباني .. و هدفنا في بدايه اطعام 10,000 انسان و في الproject نفسه من جمعيات جوا و برا الجامعه اطعام 250,000 انسان ان شاء الله ...
الحمله مشارك فيها: جمعيه بناء و جمعيه شريان الخير و جمعيه اتباع الصادقين و فريق خطي و جمعيه تداووا و جمعيه خير من زكاها و فريق Big Buddy و فريق بدايه و فريق MOIC في الجامعه الالمانيه و فريق علشانك يا بلدي في الجامعه الالمانيه و فريق نبني في الجامعه الالمانيه ...
انهرده كان أول يوم شغل ليا في الproject دا .. و أكتشفت ان الخير فينا كتير والله .. حتي الالماني و المسيحي و غيره .. كنت بلاقي ناس جنسيات مختلفه و ديانات مختلفه عايزين يساعدوا بفلوس بس عشان دا انسان جعان و فقير و محتاج .. بيشوفوا الانسان منغير دين ولا جنسيه ولا اي حاجه تانيه .. مش هتصدقوا تأثرت ازاي من الموضوع دا .. ركزوا في الانسان و بس ...
اكتشفت ان في ناس ماتعرفش كم الفقر و الجهل اللي بنعاني منه في مصر .. و تأثروا جدا لما اكتشفوا الموضوع دا ...
اكتشفت ناس عايزاه تساعد و خلاص و ناس عايزاه تساعد و تكون قدوه لغيرها و ناس عايزاه تساعد و تشجعك ...
من الاخر اللي عايز يساعد بيساعد و اللي عايز يعمل خير بيعمل خير و اللي عايز يفكر في الانسان و بس هيعمل كدا و مفيش حاجه هتوقفوا ابدا ...
ربنا يزيد فينا الخير دايما و بينا هنبني مصر و هنزيد العداله الاجتماعيه و هنقلل البطاله و نزود الحريه ...
Comments
Post a Comment