نفسويه
النفسويه دي اهم حاجه في الوجود اصلا .. لو النفسويه مش تمام هتشوفي الدنيا كلها وحشها بما فيها انتي و اي حاجه حواليكي .. لو النفسويه حلوه و منعشه الدنيا هتكون بمبي و الورد مالي المكان و اي حاجه حلوه ...
انا زيي زيكم .. نفسويتي بتتغير و ممكن اكون مش عارفه السبب اوي .. شويه افرح و شويه ازعل .. و الدنيا بتمشي .. لما بفرح بشوف الدنيا بمبي .. لما بزعل بشوف الوان تانيه بس اغمق ...
ايه اللي بيخالينا نشوف الحياه الوانها فاتحه او الوانها غامقه .. انا معرفش وصفه سحريه ولا حاجه .. بس متأكده من حاجه معينه ...
دلوقتي لو حد شافاك زعلان هيقولك معلش .. ممكن يطبطب عاليك و جايز يحضنك .. و لو فعلا بيحبك و انت عزيز عليه هيزعل لزعلك .. و في كل الحالات الطاقه السلبيه هتزيد اوي ...
بس لو حد شافاك مبسوط و فرحان هيضحك معاك و ينشكح كدا .. ممكن يحضنك و يدعيلك ربنا يفرحك زي ما فرحتوا .. و لو بجد بيحبك هيفرحلك جدا جدا .. و في كل الحالات الطاقه الايجابيه هتزيد حواليك ...
مبدأي اللي عايشه بيه .. او وصفتي السحريه .. حزني لنفسي منعا لنشر الطاقه السلبيه و فرحي للناس تحفيزا لنشر الطاقه الايجابيه ...
كلمتين في الاخر مهمين .. لازم تدفع ضريبه الفرح و هي انك تفرحي اللي حواليكي .. و لازم تدفع ضريبه الزعل و هي انك مانكونش سبب في حزن اي حد ...
Comments
Post a Comment