بنات اليومين دول
البنات اليومين دول .. تتولد تلعب و تلبس لبس كيوت و تدلع .. يكون عندها كام سنه كدا و تطلع تلعب مع الجيران علي البسطه قدام البيت تتحول لجثه و تترمي من فوق السطوح عشان خافت من حاجه هي مش فاهمها بتحصل من شابين واحد جارهم و التاني ابن البواب .. تكبر اكتر و طول ما هي في سكه مدرسه او جامعه او شغل او فسحه بتسمع كلام سم و بتشوف حركات ما يعلم بيها غير ربنا .. تحب تروح حفله ولا مسيره ولا اي تجمع انشالله طابور العيش تكون في خطر رهيب عشان تدافع علي نفسها و علي انسانيتها اللي هي اصلا حقوقها ...
الكلام دا كله لو فرضنا ان الاهالي وافقت انها تخرج من بيتها اصلا ...
طب لو فرضنا الاهالي منعوا البنت من اي خروج و من اي تجمع و دايما البنت تحت نظرهم .. و الاب او الام بيوصلوا و يجيبوا .. و كل حاجه ميه فل و اربعتشر ...
هي كدا المشكله اتحلت .. هل كدا الانسان بقالوا حقوق ولا مشي جنب الحيط و السلام و جو يا حيطه داريني .. علي رأي المثلين "ابعد عن الشر و غانيلوا" و "الباب اللي يجيلك منه الريح سدوا و استريح" .. و الناس عاشت خايفه علي بنتها بدل ما تربي ولادها ...
في حقوق مكفوله لكل انسان و ينص عليها الدستور و العرف و كل حاجه و اتكتبت تبع الامم المتحده ...
و منها ان كلنا مولودين متساوين في الحقوق و محدش احسن من حد يعني .. متفرقش بين ولد و بنت ولا شرقي و غربي ولا مسلم و مسيحي و يهودي و بوذي ولا اي تفرقه حصلت ...
كل شخص له حق الحياه و الحريه و الاحساس بالامان الشخصي .. مبقاش مشيه في الشارع خايفه و مرعوبه ولا اخاف من الناس ليكون غرضهم مش تمام ...
الحل مش في حبس البنت و منعها من الحياه و من حقوقها و الخوف عليها و متروحيش و متنزليش و متشتغليش .. الحل في انك تغير مفهوم اهل بيربوا الولد علي انه معلهوش اي غلط ولا ذنب و انه يعمل اللي يعوزوا و بس و يكون اناني و متحكم و شايف نفسه مفيش منه اتنين و ان البنت اصلا اللي غلطانه دايما .. و الحل كمان انك تغير مفهوم ولاد اتربوا كدا خلاص و تربي ولاد لسا ماحقوش يتربوا كدا و تلحقهم من سن صغير في التعليم و المناهج او في النشاطات الصيفيه و الثقافية او برامج توعيه في التلفيزيون و الراديو و كل حته انشالله تنزلوا من الحنفيه او كل دا سوا .. اكدوا ان الولد و الراجل كدا حرامي و دا بيقلل من رجولته مش بيزودها و اكد ان البنت و الست ضاحيه و تفهم الناس تسيب المجني عليهم و تمسك الجانيين ...
خالي اللي بياخود حاجه مش حقه بكلمه او نظره او غيره يتسجن و يتعدم كمان لو حكمت .. لو اتعدم 10 مجرمين و حراميه من دول علي العلن كدا الباقي هيكش و التربيه هتتعدل ...
الغريب ان كلامي انهرده اسمه "بنات اليومين دول" بس مش بنتقض البنات .. انا بنتقض الولاد و الاهالي .. انا عارفه ان كلامي دا ممكن يتبل و يتشرب ميته .. و المجرمين-اهالي او جانيين هيعملوا ودن من طين و التانيه من عجين .. و المجني عليهم ما باليد حيله اخرهم هيعملوا share و like ...
لو اتعمل مشروع رئاسي اجتماعي علي نهج مكتبه الاسره و تنظيم النسل و حمله شلل الاطفال و القراءه للجميع كدا .. و اتعمل بس لنشر التوعيه بدروس و خطابات و حفلات و اعلانات و برامج و نشاطات و كتب و نماذج اتغيرت و رجال دين و فنانيين و سفراء نوايا حسنه و روتاري و غيره كتير نفسه يعمل و يشجع و يغير ...
و الله الشعب هيتغير و هيكون مشروع مفيد زيه زي مشاريع نجحت في ارض الواقع مثلا حمالات التطعيم ضد شلل الاطفال ...
اخر كلمتين .. لو ناويين تعملوا تاريخ بدل ما تتكلموا عن 7000 سنه خلصوا من زمان .. لازم تعملوا انسان الاول و تحافظوا علي حقوقه قبل ما تطلبوا منه واجباته ...
مع السلامه :)
Comments
Post a Comment