قادرون بأختلاف 7

الشخص السابع هو عمرو السوهاجي .. خريج حقوق جامعه عين شمس و كان بيلعب ملاكمه و أخذ بطوله الاكديميه المصريه للملاكمه .. أشتغل لفتره كمحامي و بعدين اشتغا في مصر للطيران و دلوقتي شغال في المطار (شركه ميناء القاهره الجوي) ...

عمل حادثه في 2010 .. حادث عربيه لأنه كان سايق علي 210 و العجله الشمال الخلفيه انفجرت و العربيه اتقلبت 13 مره لمسافه 5 كيلو .. و عمرو بعد المره ال6 فقد الوعي و من حركه العربيه كسر الزجاج الأمامي و طار برا العربيه .. و حصله كسر في رقبته و صدره و 6 فقرات في عموده الفقري و 57 غرزه في جنبه و ضهره كله زجاج و أرتجاج في المخ عمل فقدان ذاكره جزئي لمده 7 شهور و كدمه في الحبل الشوكي سبب شلل رباعي و كمان القلب وقف 13 ثانيه و أشتغل تاني ...

فضل في العنايه المركزه شهرين و و عمل عمليه في مصر و سافر بكين عشان يعمل عمليه خطيره و جاله جلطتين في المخ الواحده كفيله تموت بس ربنا سترها مع عمرو .. و مستمر علي العلاج الطبيعي .. الداكتره قالوا ان المفروض بعد سنه و نص يحصل وفاه بس ربنا اكبر من كل افتراضات الداكتره ...

دلوقتي و بعد التعب دا كله عمرو بيمشي بجبيره و مشايه .. و الداكتره معندهمش اي تفسير لا جوا ولا برا مصر ان ازاي دا حصل اصلا .. و الخبر الحلو جدا أن عمرو بيلعب سباحه و بطل في الأتحاد الباراليمبي ...

علاقته بالمؤسسه هي انه هو اللي بيساعد المؤسسه لأنه متطوع فيها:

و هو بيساعد بنشر الوعي في التعامل مع ذوي الاحتياجات الخاصه جسديا او ذهنيا و عضو في مؤسسه تانيه كمان أسمها حلم في الجامعه الأمريكيه ...

تبع مؤسسه الحسن جات له فرصه شغل في فودافون و اتقبل فيها و كان أول مستخدم للكراسي المتحركه يشتغل في فودافون .. و لأنه بيشتغل في وظيفه حكوميه تابعه لوزاره الطيران كان صعب يشتغل في فودافون قانونيا بس عمرو قدر يقنعهم ...

كانوا فاكرينه هيضعف و هيتعب بس أتشقلبوا من المفاجأه .. مش هكدب عليكم انا كمان اتشقلبت من المفاجأه ...

عمرو شايف أن حياته قبل الحادثه زي بعد الحادثه بس علي عجل :)

الرضا بالمكتوب و المعافره و حب الحياه و التفاؤل هما اللي بيخالوا الصعوبات تهون ...

Facebook page: Alhassan Foundation

for Spinal Cord Injury

 

Website: www.alhassan-foundation.org

رقم حساب مؤسسه الحسن: ٧٠٥٧٥٠ في البنك

العربي الافريقي الدولي - فرع نادي الصيد