قادرون بأختلاف 5

خامس قادر بأختلاف هو و أخته محمد طارق و نورا طارق .. محمد طارق مهندس كمبيوتر و عنده شركه برمجيات و تصميم مواقع و عنده 30 سنه .. نورا طارق عندها 26 سنه و متخرجه من كليه لغات و ترجمه من جامعه 6 أكتوبر 

المره دي محمد و نورا محصلش لهم حادثه بس محمد و نورا عندهم ضمور في العضلات ...

محمد عنده ضمور في العضلات من و هو عنده 12 سنه و بدأ يستخدم الكرسي المتحرك من و هو في رابعه أبتدائي .. في الأول كان مكسوف من أستخدامه للكرسي و لكن بمساعده ابوه و امه بدأ يستعيد ثقته بنفسه من تاني .. المشكله الكبري بالنسبه لمحمد ماكنتش في الأعاقه نفسها و أنما في تقبل المجتمع لها .. و بالنسبه له هو كان في حرب عالميه ثالثه .. و لحد الثانوي هو كان من ال10 الأوائل في المدرسه بس في المرحله الثانويه ابتدأ أهتمامه بالدراسه يقل و أهتم أكتر انه يعيش حياته و المشاكل اللي واجهته في المرحله دي كانت العربيه عشان التحركات و كان الحل عربيه بسواق .. بدأ يختار جامعه و أختيار الكليه مكنش مشكله بس المشلكه هي اختيار الجامعه عشان تكون مناسبه لمستخدمي الكراسي المتحركه .. دخل جامعه 6 أكتوبر و المشكله الوحيده اللي واجهته ان الكرسي بتاعه manual و الجامعه واسعه اوي و أتعرف عن طريق واحد من صحابه علي الكرسي الautomatic و دا كان باب جديد اتفتح له .. و من يوم ما استخدم الكرسي المتحرك الautomatic قرر يغير حياته بطريقه ايجابيه اكتر و يعتبر الكرسي دي رجليه الجديده .. و في الجامعه رجع تاني من الأوائل و المشروع بتاعه كان الأول علي الدفعه .. بعد التخرج مكنش في ولا شركه موافقه تعين شخص من مستخدمي الكراسي المتحركه مع انه شاطر جدا في مجاله و دي كانت مشكله بالنسبه له بس بردو تحدي العالم و عمل موقع للكوره و عشان الناس تشوف الماتشات أسمه حريف و دا كان السبب انه يتعرف علي لاعبين كره كتير و دا شجعه يفتح شركته الخاصه .. مؤسسه الحسن ساعدته في معرفه ناس أكتر و يكبر دائره اصحابه ...

نورا عندها ضمور في العضلات و بتستخدم الكرسي المتحرك من و هي عندها 10 سنين .. في مرحله الجامعه انتقلت نورا من الكرسي الmanual للكرسي الautomatic .. بعد التخرج نورا كانت عايزه تعمل ماجيستير و دكتوراه في جامعه القاهره بس المكان غير مجهز بالمره .. فكرت تاخود دبلومه في الترجمه الصحفيه من الجامعه الأمريكيه بس كان في مشكله تنقل من البيت للتحرير 3 مرات في الأسبوع ف منفعش .. حاولت تشتغل مدرسه في مدرسه بس أصحاب المدرسه مكنوش بيوافقه عشان أستخدمها للكرسي المتحرك و عرض عليها شغل اداري بس هي رفضت تشتغل شغل مش بتحبه .. و قعدت في البيت بس والدتها عرضت عليها تشتغل مدرسه خصوصيه و الحمدلله دي شغلتها دلوقتي و الطلاب بيحبوها و بيجيبوا درجات عاليه معاها .. و أتعرفت علي مؤسسه الحسن و هي بتدرس في الجامعه عن طريق معيده هناك و المؤسسه غيرت وجه نظر المجتمع لمستخدمي الكراسي المتحركه ...

بالنسبه لمحمد و نورا المشاكل اللي يتواجهم في المواصلات و الطرق و العربيات المجهزه و تقبل المجتمع و الدستور  بيكفل لهم حقوق مش بتتحقق و أن الأماكن العامه مش مجهزه لمستخدمي الكراسي المتحركه ...

نورا قالت ان الحل في الفن و السينما .. لو عملوا أدوار لمستخدمي الكراسي المتحركه بس ناجحين و متعيشين و قادرين بأختلاف المجتمع هيتغير ...

أنا عايزه أشكر أم و أب محمد و نورا لأنهم ساعده ولادهم ينجحوا و يبهروني بكم الأراده و العزم و العند اللي عندهم ...

محمد و نورا انتم علمتوني يعني ايه مهما تتقفل الدنيا في وش الواحد أكيد في طريقه للنجاح بردو ...

Facebook page: Alhassan Foundation

for Spinal Cord Injury

 

Website: www.alhassan-foundation.org

رقم حساب مؤسسه الحسن: ٧٠٥٧٥٠ في البنك

العربي الافريقي الدولي - فرع نادي الصيد