اللي عايز ينجح .. هينجح 4
بنت مصريه و في اوائل العشرين بتدرس و بتشتغل في الامم المتحده .. ناشطه حقوقيه في حقوق الانسان و حقوق المرأه من ثوره يناير 2011 .. تعالوا نتعرف اكتر علي حبيبه خطاب ...
حبيبه خطاب خريجه مدرسه الالسن .. بدأت الشغل في المشاريع الحقوقيه بمشروع تخرجها من المدرسه و كان المشروع عن حقوق الطفل و الاعمال الخيريه للأطفال الأقل حظا في مصر .. دلوقتي حبيبه في الجامعه الألمانيه في القاهره بتدرس أداره أعمال و متخصصه في الأقتصاد ...
بتشتغل في مجال حقوق الأنسان و حقوق المرأه من 25 يناير 2011 .. و في ال3 سنين اللي عادوا اشتغلت تابعه لمجموعات مختلفه .. كانت بتشتغل تابعه لليونسيف و بعدين دلوقتي بتشتغل تابعه لحقوق المرأه التابعه للأمم المتحده في مصر .. في حقوق المرأه في الامم المتحده حبيبه اشتغلت في مشاريع كتير ليها علاقه بالعنف ضد المرأه و الأعتداء الجنسي و التحرش و ختان الأناث و المساواه بين الرجل و المرأه و كل حاجه لها علاقه بالمرأه من بعيد او من قريب .. حقوق الانسان و حقوق المرأه بنسبه لحبيبه بيشكلوا شغفها الخاص .. و من وجه نظرها دا المجال اللي لو تم الاهتمام بيه هنحقق الديموقراطيه ...
و لأن دراستها في مجال الأقتصاد .. حبيبه عايزع تشتغل في تطوير الأقتصاد و حل المنازعات ...
حبيبه اختارت تكون ناشطه حقوقيه عشان هي مؤمنه بفكره التغير و ان التغير هو الطريق الوحيد لتعديل الواقع .. و ان كل واحد فينا هو حافز للتغير ...
في الأخر حبيبه بتقول لكم أقروا القانون و الدستور و اعلان حقوق الانسان للأمم المتحده عشان تعرفوا ايه ليكم و ايه عليكم :)
حبيبه بنسبه ليا نموذج مفرح لبنت عرفت هي بتحب ايه من سن صغير .. مش بس عرفت لاء دي اشتغلت عليه لحد ما وصلت لأنها بتشتغل في الامم المتحده مره واحده .. ما شاء الله عليها لأنها فعلا نموذج لبنت عايزه تنجح حتي لو ظروف البلد بنقول انها مش سامحه اوي يعني ...
انا شخصيا اتعلمت من حبيبه اني أكسر كل الشماعات اللي بنعلق عليهم فشلنا او عدم تحقيقنا لأحلمنا :)
Comments
Post a Comment