شويه دردشه
حبيت احكيلكم قصص واقعيه حصلت معايا و خالتني اكون انا بتاعت دلوقتي .. نفسي كل اللي يقرا يستفيد .. لو تعرف ام او اب جداد شارك معاهم القصص دي .. و حاول تشارك القصص دي مع اولادك و بناتك و اي ناس تعرفها :)
في يوم زمان اوي اوي اوي .. جايز ابويا و امي اصلا نسيوا .. بس اللي حصل اليوم دا عمري ما نسيته و فضلت فاكراه لحد دلوقتي .. و دا اللي علمني اني اساعد اي حد محتاج مساعده ...
كان بابا بيسوق العربيه و احنا قاعدين بنسمع اغاني و بنتفرج من الشباك علي الناس .. و شوفنا راجل كفيف و مش عارف يعدي الشارع من كتر العربيات .. و بابا ركن العربيه و نزل مشي جنبه و ساعده ...
كل ما اتخيل ان جايز الراجل دا كانت عربيه خبططه لو بابا ماسعدهوش افرح اننا صبرنا الدقيقتين دول و ساعدناه :)
في يوم تاني قريب .. ابويا كان بيوصلني الجامعه و في الطريق بنعدي علي ست غلبانه بحبها اوي و بحب اساعدها .. ف مكنش معايا فكه و زعلت جدا .. ف بابا كلمني من عندها و هو راجع و قال لي انا ساعدتها بدل منك .. اتاخرت علي الشغل بس مش مشكله :)
انهرده و انا رايحه مع بابا الجامعه قلت ل بابا معايا فكه المره دي .. و قالي كل جنيه هتدفعيه هزود عليه جنيه كمان للست اللي بحبها دي .. و بصراحه انا اتشجعت و حببني في الخير حتي و انا كبيره و مش في سن انه يعلمني يعني ايه خير .. و لما سألته اديها الفلوس القديمه ولا الجديده قال لي لاء الجديده طبعا :)
مره امي كان عندها لبس قديم بس حالته كويسه جدا و كان في راجل غلبان و طيب هي بتحبه في شارع معين .. و ماما و بابا قاعدوا يدوروا عليه عشان يفرحوا :)
كل ما يجلنا انشالله برد ولا زكام .. لازم بابا يدفع في الجامع صداقه .. و ماما تقول عشان ربنا يشفيكم و يحفظكم :)
من الاخر كل حاجه بتعملها قدام عيالك او معاهم بتأثر فيهم جدا و بتعلم فيهم لحد ما يموتوا .. التعليم و التربيه مش بس ب اه و لاء .. لكن التربيه اللي بتدوم لما تعمل قدامهم و تعمل معاهم ...
قرب عيالك لربنا و ربنا هيقربلهم كل حاجه في الدنيا :)
Comments
Post a Comment