الزمان و المكان
كان نفسي اعيش زي ما الناس عايشه في المسلسلات و الافلام و الكتب .. الحياه هناك سهله اوي بس الحياه هنا صعبه اوي اوي ...
هناك في الكتب و الافلام و المسلسلات في حب اوي و في خناقات بتتصلح بسهوله اوي و في روقان و في مشاكل حلولها بسيطه و في هدوء نفسي ...
هنا في الواقع في حب بس مش اوي و في خناقات مبتتصلحش و النفوس بتشيل كتير و مافيش لا روقان ولا راحه بال لأن في ضغوط كتير و مشغوليات اكتر ...
دا رأي ناس كتير اوي .. شايفين ان الزمن اتغير و كل حاجه مابقاش لها طعم ولا لون .. في ناس كتير عايزه تهرب من مكانها و زمانها .. اللي عايز يعيش في الخمسينات و الروقان اللي بيجيبوا الافلام الابيض و الاسود .. و اللي عايو يهاجر ...
طب سؤال هو الهروب من الزمان او المكان دا حل .. يمكن ناس تشوفوا حل .. طب السؤال الصح دا واقعي ...
المشكله في وجه نظري لا في المكان و لا الزمان .. بس في الانسان و الاخلاق و الطباع .. يعني مهما غيرت في اماكن و ازمنه المهم القالب اللي عايش في اي ما كان الزمان او المكان ...
تعالوا نفكر كدا .. لو غيرنا شويه في طباعنا و شخصيتنا و بقينا احسن .. فاهمين الحريه صح و مهتمين بغيرنا زي ما بنهتم بنفسنا .. لو عملنا كل دا و تعاملنا بحق ربنا كدا .. هنحب زمانا و مكانا كمان ...
يلا نرجع اخلاق زمان و طباع زمان و بكدا هيرجع الزمن حلو و المكان حلو .. هيرجع الحب اوي و المشاكل حلولها بسيطه و النفوس هاديه و رايقه و بتصفى بسرعه .. من الاخر عشان نعيش في افلام الابيض و الاسود لازم نرجع بنفوسنا للزمن دا :)
من الاخر الزمان و المكان بيتغيروا بينا احنا!!
Comments
Post a Comment