الست
اللي يعرفني كويس يعرف ان الموضوع دا مأثر فيا جدا جدا .. و اللي ميعرفنيش كويس قررت اعرفكم الموضوع دا ...
في ست عجوزه جدا .. عند المدافن اللي في طريق الNA دايما قعده علي كرسي متحرك و وشها في الارض و مش بتكلم و لا بتقول اي حاجه .. يعني هي مش شحاته و دا مش هدفها ابدا .. لا معاها روشته من 100 سنه ولا بتزن و لا بتجري ورا العربيه .. معندهاش صحه تخالينا نفكر 100 مره قبل ما نساعدها انها ليه مبتشتغلش ...
أنا للأسف عرفت قصه الست دي من الدكتوره بتاعتي في الجامعه .. و بجد مش عارفه اقول يارتني ما عرفت ولا اقول الحمد لله اني عرفت و يا رب قدرني اني اسعدها و اساعد الناس تساعدها ...
الست دي بنتها كل يوم الصبح بتجيبها علي الطريق .. و من غير اي رحمه بتسبها في وسط الشارع .. في عز البرد لما حد بيلف علي الست بطانيه تاني يوم البطانيه بتختفي .. و لو حد حط لها شمسيه تاني يوم ماتلاقيهاش بردو .. و لما دكتوره رغده الابراشي كانت بتجمع حالات لدار مسنين راحت للست دي .. الست قالت لها القصه و قالت كمان انها ماتقدرش تسيب بنتها ...
تعليقي ان البنت دي حسابها عسير عند ربنا .. ببساطه معرفتش قيمه ان يكون عندها ام .. و بتعامل امها علي انها وسيله عشان تجيب فلوس كل يوم .. بس عايزه اقول للست دي ان حسابها عند ربنا كبير لأنها برغم كل شئ ام و مش قادره تكره بنتها ...
نفسي بدل ما بنتصدق للست دي بفلوس بنتها بتاخودها .. نديها اكل تستفيد منه الست بس .. نحاول و احنا بنديها اي حاجه اننا نفرحها بكلمه طيبه ولا دعوه حلوه ...
مش هتكلم اكتر من كدا عشان مافيش كلام يتقال اكتر من كدا .. يا رب تربيه اهالينا تجي معانا بنتيجه و يا رب ارزقنا الابناء الصالحيين :)
Comments
Post a Comment