رساله الي رئيس جمهريه مصر العربيه
انا عندي رساله لأي واحد ناوي يترشح للرئاسه او مرشح للرئاسه او كسب او هيكسب .. و نبي ساعدوني اوصل رسالتي :)
انا مبتكلمش في السياسه كتير و بفهم فيها علي بسيط كدا .. بس نفسي في شويه حاجات تتحقق ...
يعني ميهمنيش اسم .. ميهمنيش شغلتك قبل الرياسه .. ميهمنيش عملت ايه قبل كدا ...
اهم حاجه عندي انك تكون راجل او ست .. موظف بدرجه رئيس جمهريه مصر العربيه ...
عايزاك تكون انسان .. عايزاك تحس بكل انسان تاني في كل حته في مصر .. عايزاك تفتح بابك و قلبك لكل انسان ...
نفسي اكون ماشيه في الشارع و حضرتك جنبي عادي كدا .. مش لازم موكب .. مش لازم حراسه .. ماتخفش مني ولا من اي انسان .. لو بنحبك مش هنضرك ولا هنسمح لحد يعمل دا ...
نفسي لما يكون عندي فكره ولا شكوي اقدر اخود معاد و اقابلك في القصر .. مش لازم لما احب اوصل صوتي اجمع ملاين و امزل الميدان ...
مش عايزه اشوف ناس مش لاقيه بيت ولا اكل ولا شرب ولا لبس ولا اهل .. و الله لو بدأت تساعدهم هتلاقي ملايين المصريين نزلين ايدهم في ايدك عشان يساعدوك .. يلا مع بعض نحل مشكله اطفال الشوارع و البطاله و الفقر و الجهل و كبار السن ...
لازم نغير انظمه كتير .. قديمه او مش مفيده او مضره او غيره ...
دي رساله من مواطنه في تعداد الشباب و القوه العامله .. مليانه تفاؤل و امل .. عندها حيويه و طاقه ايجابيه .. مليانه افكار و مستعده تكون ايدها في ايد الريس و كل انسان في مصر ناوي يخلي مصر ولا اوروبا :)
اهر حاجه .. الامل قدامنا و المستقبل لينا .. بلاش تشاؤوم .. و وحياه اغلي حاجه عندكم بلاش فرعانه .. بلاش اننا نحب يكون لينا فرعون لان دا كان زمان اوي .. دلوقتي اسمه رئيس جمهريه و لازم يتغير كل 4 سنين ...
انزل دايما في اي تصويت .. صوتك بيفرق و هيفرق .. و الامل موجود دايما :)
Comments
Post a Comment