و لسوف يعطيك ربك فترضي :)
دايما بنفتكر ان اللي بيضحك دا مبسوط من جوا زي ما هو باين من برا .. دا مش بعيد نحسده كمان .. بس هو ممكن جدا يكون في موقف لا يحسد عليه .. و لو انت مكانه كان زمانك مكتئب اكتئاب ملوش اخر ...
الفرق بينه و بينك ان اللي بيضحك دا قوي اوي .. بيضحك حتي لو زعلان .. بيقابل كل مشاكله بابتسامه .. مش بيشيل اللي حواليه همومه .. و واثق اوي في ربنا ..
انت متعرفش مين مبسوط و مين زعلان .. ولا تعرف مين بيضحك من قلبه و مين بيداري دموعه ...
كل ما تشوف حد بيضحك او لاء ادعيله ربنا يفرح قلبه .. ادعي لنفسك و لكل الناس ادعيلهم دعوه بظهر غيب .. ادعي لكل الناس ان ربنا يحبهم و يفرحهم ...
"و لسوف يعطيك ربك فترضي" من احلي الأيات اللي ممكن اي حد يسمعها .. و دي اكتر جمله بحس ان ربنا بيقولها لي .. ربنا هيديني لحد ما ارضي .. اسكت و متبوصش في حاجه غيرك .. ربنا هيعطيك و هترضي ...
مهما شوفت في يومك و مهما حصل في حياتك في الاخر اللي ربنا عايزه هيكون .. مهما زعلت عشان حاجه محصلتش او زعلت عشان حاجه مكملتش اكيد ربنا ليه حكمه ...
سيبها علي ربنا .. و ثق فيه انه هيعطيك لحد ما ترضي .. امتي و فين و مين و ازاي و ليه ملكش فيه .. ليك بس انك هترضي في الاخر ...
Comments
Post a Comment