بنت و ولد في مجتمع شرقي
نفسي اكتب في الموضوع دا من مده .. بس كل ما اكتب اقول دا cliche اوي .. و دلوقتي الناس كلها بتكلم و بتكتب و hashtags .. بس بردو مش قادره ما اكتبش فهكتب و رزقي و رزقكم علي الله ...
هتكلم انهرده زي ما واضح عن البنت في المجتمع الشرقي و الولد في المجتمع الشرقي بردو .. في مشكله عملاقه او gap كبيره بين الاتنين و بين التربيه و بين الاهالي و الgaps مش بتخلص اصلا ...
يعني من اول تربيه الاهالي اللي تقريبا ما تغيرتش من ايام الفراعنه دا اتحولت للاوحش .. تفرقه بشعه بين تربيه الام و الاب للولد عن للبنت .. و يوم ما الولد يشرب سجاير يبقي حبيبي كبر و بقا راجل .. يوم ما يعاكس بنت يبقي شاطر كبرت .. و النبي يوم ما هيعلي صوته عليكي و مش بعيد يضربك اوعي تضايقي ولا تتخانقي معاه انتي اللي خليتيه يحس انه سي السيد و مفيش منه و انه فوق الجميع و يغلط نقول معلش ...
انتي ليه ك ماما يعني بتكيلي بمكيالين .. اه للولد و لاء للبنت .. و لو حاجه حرام ف هي حرام علي كله ولد و بنت .. مافيش حاجه اسمها اصله ولد و اصلها بنت .. في الاخر احنا الاتنين انسان ...
ليه مش بتربوا راجل ليه .. يعني بصراحه رأي البنات في اغلب الولاد انهم اطفال و سطحين و مش بنحس انهم رجاله .. اصل مافيش راجل بيعاكس و كدا خالص .. ما فيش راجل بيسرق .. اه بيسرق .. اصل السرقه مش بس فلوس و موبايل .. ممكن السرقه تكون ولد بيسرق مني الامان و انا ماشيه في الشارع ...
من كل الكلام دا انا عايزه اقول احنا اللي بنربي غلط و بنفرق .. مع ان في الاخر ممكن البنت تكون متعلمه احسن و احلامها افيد بس من التربيه الغلط الاحلام ماتت منتحره و محصلتش .. نفسي نبطل نكيل باكتر من مكيال و نخالي الحرام حلال للولد و الحلال حرام للبنت ...
Comments
Post a Comment