كفايا احلام سعيده و خالينا في الواقع السعيد :)
كل بنت دايما بتحلم بفارس الأحلام .. المجتمع كمان بيجبر البنت تفكر بالطريقه دي .. طريقه فارس الأحلام .. مع موسيقى تصويريه .. أغنيه شباكنا ستايره حرير ... و البنت تقعد تحلم بالفارس اللي هياخدها علي الحصان الأبيض و يطيروا .. و يا حرام الغلبانه ماتعرفش ان الحصان مش بيطير .. و كمان مافيش فارس زي بتوع ديزني .. دول حاجات بيضحكوا بيها علي العيال عشان بضحكوا و يناموا مبسوطين مش اكتر ...
دا مش تشاؤم .. بعد الشر عني و عن المدونه من التشاؤم .. بس دي رساله عشان نفوق من فارس ديزني .. و نركز فالانسان اللي هيكملنا و ندبس فيه طول عمرنا ...
بدل ما تحلمي يا موكوسه بفارس في خيالك و بس .. احلمي بانسان مش فارس .. احلمي بحقيقه مش خيال .. كل حاجه صغيره بتحلمي بيها في الانسان اللي هيكملك بردو حققيها في نفسك الاول .. يعني لو عايزاه محترم و متربي و بيخاف ربنا و طموح و كل الحاجات الحلوه دي .. خاليكي انت كمان كدا .. اصل كل واحد بياخد اللي شبه و كمان بيكملوا ...
و في الأخر .. يلا نحلم بالأنسان اللي هيكملنا منغير ما يكون خيال ولا فارس علي حصان بيطير .. و نلبس الفستان الابيض و التاج و الدبل و البدل و كل حاجه ...
مهم اوي اننا نعيش بتفاؤل علي ارض الواقع .. كفايه احلام سعيده بس هتفضل احلام و خالينا في الواقع السعيد بردو :)
Comments
Post a Comment