حدوته مصريه
ركز كدا في وشوش الناس .. هتلاقي الشعب المصري كله تايه .. في حاجه ضايعه منه .. يمكن يكون ضايع منه نفسه ...
ركز كدا هتلاقي رجاله و ستات و اطفال ماشين بلا هدف .. بيجوروا في رجلهم واحده ورا التانيه فيتقدموا لهدف مش عارفينه اصلا ...
انزل الشارع و ركز في وشوش الناس .. بس ونبي من غير بحلقه جامد متجبولناش مصيبه .. هتلاقوا الأغلبيه العظمه نايمه و نعسانه و فاتحه عنيها بالعافيه .. و ناس بتعدي الشارع علي امل حد يدوسها، اصلا هو مش مركز و بعدين لما يتخبط يا يموت و يرتاح يا يعيش و ياخود تعويض و يرتاح راحه تانيه بالفلوس اللي اتحدفت له من السما ...
لو ركزت في ظروف الأغلبيه العظمه دي .. هتلاقي الظروف واحده .. بيني و بينكم ظروف تتوه بلد .. و للأسف احنا ولا احنا هنا ولا يجي في بالنا اصلا غيرنا عايش ازاي ...
راجل بيشتغل ب500 جنيه فالشهر و جايز اقل كمان .. المفروض هيعيش بدول طول الشهر، لا و كمان يحوش لزوم جواز بنته ولا ابنه و لو صحته هو و مراته تعبت ولا حاجه و للاكل و الشرب و التعليم .. و لما يوصب 60 ياخد معاش اقل كمان دا لو خد ...
طب ما لازم الام و الاب يمشوا مسهمين طبعا .. دول عايشين بالبركه ...
و كمان بالمره لازم العيال يمشوا مسهمين .. مش عارفين لو عاشوا انهرده يا ترا هيعيشوا بكره ازاي و منين و المستقبل شايل اه ...
انا بكتب دا كله عشان نعرف ان الحياه علي ناس كتير هم كبير و تقصر العمر .. ماحدش ناقصك .. طول ما ظروفك كويسه و عايش مبسوط .. انشر بس سعاده و ابتسامه حلوه .. و خفف عن شعب تعبان اوي ...
Comments
Post a Comment