صلحها في دماغك

يومين تدوين علي الhash-tag (#صلحهاXدماغك) علي الFacebook و الtwitter و الblogs .. 

مجموعه من المنظمات و المبادرات شاركت في تنظيم يومين عشان نعمل دوشه و نصلحها في دماغنا .. الحمله دي عشان نغير مفهوم العنف ضد النساء .. 

من المفاهيم اللي انا احب تتغير و قررت اكتب عنهم انهرده ..

• الحرام حرام علي الكل بنات و ولاد
• الحلال حلال علي الكل بنات و ولاد
• مش من حق اي حد انه يضايق حد تاني عشان بيختلف معاه
• حريتي تنتهي عند بدايه حريات الغير
• اصول الادب و التربيه واحده بين البنات و الولاد

نرغي في نقطه نقطه بقا ...

هبتدي في الكلام عن النقطه الاولي و التانيه سوا ..

الحرام حرام و الحلال حلال .. ربنا لما نزل الحلال و الحرام محصلش تقسيم اصل دا ولد ولا اصل دي بنت .. يعني الحرام علينا كلنا حرام و الحلال علينا كلنا بردو .. و لو  في حاجه المجتمع بيرفضها لازم تترفض علي البنت و الولد ...

ماينفعش اقبل الولد يشتم عادي بس البنت لاء .. في الاخر دا تلوث و شتايم و مايصحش لا الولد و البنت يعملوا دا ...

لو اتكلمت عن الحريه .. مبدأ كدا ان حريتي بتنتهي عند بدايه حريتك .. و بردو مش من حق حد انه يرفض حد ولا يضايق حد اصلا .. انا موجوده في الحياه غصب عنك و انت موجود في الحياه غصب عني .. لازم نتعايش سوا ...

الكلام اللي جاي دا لكل الامهات و الابهات و لكل اللي هايكونوا في يوم امهات و ابهات .. و ليا قبلكوا كلكو .. في تربيتنا لأولدنا لازم منفرقش بين ولد و بنت .. لازم نبطل نظريه سي السيد و امينه عشان بطلت اوي ...

و في الأخر مشاكل التعليم للبنات و الزواج المبكر جدا للبنات و البسبسه كمان و المعكسات و كمان العنف الاسري .. كل دا اهم اسبابه الجهل و التربيه الغلط .. دورنا نفهم نفسنا و غيرنا .. العنف بيولد عنف .. و ان الحرام واضح و الحلال واضح .. 

اخر حاجه عايزه اقولها ان لازم يكون في قدوه حسنه فالاخلاق تتغير للاحسن و تنعدم نسب التفرقه بين الولد و البنت .. كفايه افلام اسفاف .. كفايه اعمل من ممثليين الاسفاف ابطال .. 

انا وصلت كلامي البسيط و اتمني كل و احد يكتب عايز يصلح اه في دماغه و دماغ غيره ...