كوكب تاني

كلنا مش راضيين عن الكوكب ككل .. عندنا شعور بلا انتماء و رغبه فالانتقال لكوكب غير ...

طب هنروح فين .. في كواكب تانيه كتيير .. دا تصوري للحاجات اللي هخدها معايا في الكوكب التاني اي ما كان ...

اولا هاخد ماما و بابا و اختي .. هاخد صوره تيتا الله يرحمها .. هايكون في قطط و نمور و اسود و بوم و افيال و بس ...

هيكون في بنات شعرها طويل و ولاد شعرهم قصير و بس ...

هيكون في تفاؤل و سعاده و تعاون و حب و سلام .. هيكون في اخلاق .. 

هيكون في لبس شيك و لايق علي بعض ...

كوكب في الحق ما بيضعش و كمان الناس اصيله .. فيه سعاده كتيير و الحزن نادر ...

كوكب فيه الراجل لسه راجل و البنت لسه بنت .. و في حقوق انسان و حيوان و اطفال و المرأه كمان ...

كوكب مريح نفسيا .. كوكب هادي و فيه خصوصيه ...

هيبقي كل الاماكن اللي بنحبها موجوده في مكان واحد .. شارع المعز و برج ايفل و الاهرامات و خضار كتيييير و بحر كتييير و جبال عاليه ...

كوكب مليان الوان كتيير اوي .. كوكب مليان نضافه .. كوكب مليان امان .. كوكب مليان لمه ...

كوكب عليه الاكله الرسميه غزل البنات و المشروبيين الرسميين هما القهوه و البيبسي ...

كوكب فيه الحريه لكل الناس .. كوكب مافيهوش تقييم من شخص علي غيره اصل كلنا ولاد حوا و ادم .. كوكب فيه الناس بشوشه ...

علي كوكبنا دا مافيش حد بينحشر فالمالوش فيه .. كوكب مليان قراءه و كتب و رسم جرافيتي ...

من الاخر الكوكب دا مش علي ارض الواقع .. دلوقتي علي الاقل ... 

ممكن نعيش في الكوكب دا في دماغنا .. نكون احنا الكوكب دا .. بتعاملتنا الناس هتحب الكوكب دا و هتيجي الناس تعييش معانا .. ممكن في يوم الكوكب دا يكون كوكب الارض .. هيبقي الكوكب دا واقع بس لو صدقنا الحلم :)

من وحي صفحه "كوكب تاني" علي الفيسبوك ...