مش رابعويه و لكن

رابعة...
يعنى و انت داخل هتلاقى الشاب اللى بيفتشك...و جنبه الشيخ اللى بيثبتك !
يعنى لما تيجى تشترى حاجة من أى بائع فى الميدان و تقوله مفيش فكة...هيقولك "يا عم خليها لبكرة"
يعنى هتلاقى الناس اللى بتفطر فى الدور الأرضى فى الخيمة...و تطلع تاخد الشاى فى الroof "اتفضاااال"
يعنى لما تكون حران مش قادر...هتلاقى المياه بتترش عليك من كل حته
يعنى كلمة "أمين" اللى بترج الميدان..بعد كل أذان
يعنى أكتر كلمة اتقالت على المنصة...بارك الله لكما و بارك عليكما و جمع بينكما فى خير
يعنى لما تحب تاخد الميدان فى 3 دقايق "وسع معانا أخوات" هتلاقى الميدان اتشق نصين
يعنى طرومبيطت الألتراس مع هتاف "يسقط حكم العسكر" اللى دايما بيطلع بحماس مختلف
يعنى خيمة مكتوب عليها 'هنا عيادة المخطوفين ذهنيا'
يعنى تتسحر مع جيرانك اللى فى الخيمة اللى جنبك
يعنى لما حاجة تقع منك فى مسيرة بره رابعة...ترجع تلاقى حد وداها الأمانات ورا المنصة
يعنى الحماس اللى بيتولد كل يوم لما يعدى الراجل بتاع سنخوض معاركنا معهم بعد السحور
يعنى مسيرات بعمة الأزهر بتلف كل يوم الميدان
يعنى مسيرات الستات فى نهار رمضان و هما بيهتفوا بابتسامة "متعبناش متعبناش الحرية مش ببلاش"
يعنى تلاقى نفسك بتهتف ورا طفل بحماس و هو بيقول "ابعت يلا هات القناصة لسه فى صدرى لرصاصة
يعنى ابن شهيد بيهتف "فوضت السيسى؟ فوضت خلاص؟ قتلوا أبويا بالرصاص
يعنى إبتسامة شهيد تثبتلك انك على حق
يعنى أم شهيدة بتبارك لأم شهيد
يعنى جريح تلاقيه ماشى جنبك فى المسيرة و مصمم يكمل
يعنى مصعب و سنوسى اللى ماتوا و سلاحهم كان كاميرا توصلك الحقيقة
يعنى هالة و حبيبة و أسماء اللى راحوا عشان انت تعيش بكرامة
يعنى مصاب شايل شهيد، فبقى هو كمان شهيد
يعنى ناس صمدت اكتر من 13 ساعة تحت ضرب النار عشان يدافعوا عن فكرتهم
فى رابعة..
صلينا
و سجدنا
و ركعنا
و داعينا
و هتفنا
فى رابعة اتولد الحلم، و مات عشانوا كتير و اتجرح اكتر و لسه لينا معتقلين !
عشان كدا
احنا مكملين..
احنا مكملين..
احنا مكملين ..

دي مش كتابتي .. دي كتابه بنوته رابعويه اسمها نور عشوش .. نور كانت معايا في المدرسه .. يمكن مكلمناش ولا مره تقريبا .. بس هي بتعرض وجه نظر يمكن مش وصله لمعظمنا .. 

انا منزلتش رابعه و معرفش كانت عامله ازاي اصلا .. بس لما كنت بعدي فالعربيه كنت بشوف ناس غلابه و شكلهم طيب و مش مضريين في حاجه .. كنت بشوف بشر عاديين جدا ..

انا مش اخوان و مش ربعاويه ولا حاجه بس احب اعرض كل وجهات النظر .. احب كمان العدل و الناس دي مات و اتصاب منهم كتيير اوي ..

انا و لأول مره بقولها انا لما نزلت الاتحاديه كنت مع السيسي ضد الارهاب .. بس مش ضد ناس طيبيين و غلابه ..

في الاخر محدش عارف فين الحق .. شوفنا في كل صوره و فيديو الحاجه و عكسها و مش فهميين .. شوفت الجيش و الشرطه بتساعد الناس يوم الفض و شوفت ضرب و قتل و اعتقال .. طب اصدق اه ... 

في رأي ممكن احاكم المسؤلين محاكمات عادله .. بس الشباب المعتقل و الشباب اللي مات ملهمش ذنب ...

#مجرد_رأي و لازم يحترم عشان احترم رأيك .. انا و الله مش اخوان و مش رابعويه بس العقل بيقول ان الارواح اللي ماتت دي ملهاش ذنب و اللي اتصاب و غيره اللي معتقل ..

اكتر حاجه واجعه قلبي و مخالياني اكتب دلوقتي هي نظره Teacher Assistant عندي فالجامعه .. اصيب في رابعه و نظره بتقول انه انكسر و دا اللي واجعني .. في مصريين في مصر مكسوررين .. 

نفسي اشيل من عينه نظره الكسره دي .. اتمني كلامي يوصله و يشيل كسره عينه ..

في الاخر لازم كلنا ندعي ان ربنا يدلنا علي الصح .. و ان ربنا يقدم لنا و لمصر اللي فيه الخير ...